U bent hier

Venlo 2011

Declamatiewedstried Venlo

Kièk veur de foto's heej

VERSLAAG VAN DE DECLAMATIEWEDSTRIED 15 APRIL 2011 IN VENLO

De veurróndes

De veurróndes van de declamatiewedstried zien gehalde op 4, 5 en 6 april in de Venlonazaal aan d’n Hoeëgewaeg. Aan die veurróndes kóste de basisschoeële oet Blierick en Venlo meidoon. Oetintelik meuste d’r 40 kinder euverblieve die mei meugde doon aan de finalewedstried.
In die dreej daag haet de jury ’t erg lastig gehad; d’r ware zoeë vuuel kinder die good eur bes hadde gedaon um eur gedich van boete te liere en dao ouk nog ein leuke veurdrach van te make..
D’n eine droog met knikkende kneen zien gedich veur, d’n andere schödde ’t zoeë oèt ziene mouw en ’n paar kinder hadde waat hölp van de jury nuuedig.
Veur ’t iers hebbe weej deze wedstried in de Venlonazaal gehalde wao weej door Matthijs good óntvange woorte en wao nuuedig aan alle kante geholpe woorte. Lony Wouters

De Jury

Op 15 april um 19.00 oor begós de finale, de jury bestónd dit jaor oèt leje van Café Chantant beej Grandcafé Baer de Woers: Claar Boots (speult Mieke Maos), Mirjam van Elderen (speult Fientje Maos, de dochter van Mieke) en Bram Holla ( speult Baer de Woers).
De äöpening begós met de kinder die ’t vurrig jaor gewónne hadde met eur versje:
Hanneke Steinman (winnaeres van de Giel Aerts trofee 2010) met ’t versje “Kerse”, Julia Seetsen met ’t versje “Ierlik deurt ’t langs” en Deveny van Cleef met ’t versje “Häörkes knippe”.

De finaliste

De finaliste hebbe eur versjes schoeën opgezag en de jury haet met aandach geluusterd en de punte aan Wilma Janssen doorgegaeve die ze metein in de computer inveurde.
In de pauze hebbe de Venlose Aolieneutjes ónder de leiding van Simone op de Laak opgetraoje en 2 jungskes oet ’t Ven: Luuk Slaats en Wouter Kuys die ’t Vleegersleedje imiteerde (Supersjoene daag). Nao de pauze hebbe nog 18 kinder eur gedichje opgezag. Daonao krege weej via de computer d’n oetslaag (einen drök op de juuste knoep en ’t waas gebeurd!). Beej alle kinder en ouk vaders en moders, opa’s en oma’s boensde ’t hert in de kael van de spanning.

Oètslaeg

Groep 3/4 1ste plaats: Sjraar Timmermans van de St. Martinusschoeël met :

Tandpien van J. van Kraay-Apeldoorn

Bartje had tandpien en bäökde van de pien. Daorum meus hae beej d’n tandarts zien.
D’n tand meus d’r oèt, hae kreeg ein spuitje in de mónd, waat hae gaar neet prettig vónd.
Wie hae thoèskwaam vroog Pap, dae leuk woel zien: “En Bartje duit d’n tand nog pien?”
Bartje zaet: “Wie kin ik det noow weite? Ik kreeg um neet mei en bin direk gaon pleite!”
!2de Deveny van Cleef met Tandpien
!3de Lynn Nissen met Groeët genóg

Groep 5/6 1ste plaats: Sjuul Brueren van de Hertog Reinoudschoeël met:

MIEN OMA van J. v. Kraay-Apeldoorn

Minse, allemaol opgelet, Mien Oma wilt op internet.
Blood, zweit en traone kos eur det, Umdet zeej nog lang neet alles wet.
Haet ze ein fout knuupke ingedouwd, Krieg ze ’t al Spaans benauwd.
Griep ze nao de tillefoon, En belt in paniek dan eure zoon.
En zaet: “dae knómmel duit ’t neet, Ik weit ech neet wao det aan leet.”
Dae zaet: “’t Is ein fluitje van ‘ne cent, De bis toch zeker nog neet dement?”
Zeej antwaord dan ‘n bietje fel: “Ik heb niks met Apestert en Punte-Nel.”
Waorum zoeë ingewikkeld doon? Simpeler vindt zeej de tillefoon.
Daobeej neemp eure alde kop, De nieje techniek zoeë snel neet op.
Aan pen en pepeer is toch niks verkièrd. Zeej vindt det ze in eur laeve genóg haet gelièrd.
Moès, klik, surfe, s.m.s. en internet Zeej vindt ’t allemaol “Naatje Pet”.
Maar al moppert ze noow nog maar allein, Ièrsdaags geit mien Oma toch online.
!2de plaats: Janey Donders met De Waorheid.
!3de plaats: Isa Schattorie met Mien Oma.

Groep 7/8 1ste plaats: Lony Wouters van de St. Martinusschoeël met:

HOJJE van Hans Jacobs

Ik bin verdretig, kin dao niks aan doon. De mood zak mich wies deep in mien schoon.
Kin waal bäöke, kriète, tis hartstikke stóm Pap krieg niej werk, vreselik dóm!
Want weej mótte noow verhoèze, oèt Venlo e-weg Nóndepie, weej kómme wièd-e-weg terech.
Gans nao Friesland, dao baove in ós land. Dao wuurt pap baas van de Friese Courant.
En mam en ik mótte mei, dae is neet good wiès! Weg oèt Venlo, weg oèt ’t Paradiès!
Kin waal janke, wil in ós Stedje bliève. Maar pap zaet det ik maar mót zwiège.
De kóffers zien al gepak, die staon in de gank. Kièk nao miene bokekas, nog maar ein laege plank.
Kin waal bäöke, heb op schoeël al hojje gezag. Stónd te kriète, terwiel ik anders altièd lach.
Hojje Venlo, hojje Stedje van Lol en Plezeer. Maar weit: ik kóm truuk, later, bin heej vuuëls te gaer…
Hojje…
!2de plaats: Bram Peeters met Toepe
!3de plaats: Jamie Simons met Hojje

De winnaers ginge nao hoes met ‘n medalje en ’n kedobón, Alle deilnemers krege ’n oeërkónde en ’n klein kedootje. De 1ste en 2e plaatse meuge meidoon met de Limburgse Finale, 21 mei a.s. in Gelaen. Weej winse óg hiel vuuël sukses names Veldeke-krink-Venlo!