U bent hier

Veldeke Oeuvre-Pries veur Ton Engels

Veldeke Oeuvre-Pries veur Ton Engels 

  • Kroeën op ‘t werk veur leedjesmaker oet Panningen 

Ton Engels is dit jaor de óntvanger van de Veldeke Oeuvre-Pries van ’t Limburgs Leed. Veldeke Venlo-veurzitter Henk Buskes makde dit in ‘t L1-radioprogramma Plat-eweg van Henk Hover bekind. De oet Panningen aafkómmende leedjesmaker wuuert daomei ge-ierd veur zien groet oeuvre. Normaal wuuert de pries tiedes de Nach van ’t Limburgse Leed oetgereikt, omdat ‘t evenement door de coronasituatie neet doorging, vónd de oetreiking plaats in de oetzending van Henk Hover. 

  • Motivatie Dialekvereiniging Veldeke Venlo 

Veurzitter Henk Buskes: Ton mak ós al mieër dan viefentwintig jaor moeëje dialectmuziek. Hae haolt ‘t ónderste van zien kunne deep oet zien zeel. In al zien puurheid is hae eine bevlaoge zenger en leedjesschriever. Ton Engels haet zien nummers in hiel Limburg en ouk vaer dao boete oetgedrage. Hae huuert tot de allerbeste singer-songwriters dae ós provincie aan te beje haet. De poëtische krach van zien leedjes gecombineerd met zien geweldige gitaarspel mak Ton tot eine arties van de baoveste plank. Op professionele wies zet hae zich al jaore in om idderein kinnis te laoten make met zien leefde veur Limburg, door middel van zien leedjes en optreije. Hae is eine echte ambassadeur van ózze Limburgse cultuur en ós  leedjes. 

  • De Veldeke Oeuvre-Pries van ’t Limburgs Leed 

Veur de vieftiende kier gif Dialekvereiniging Veldeke Venlo de Oeuvre-Pries oet. Det dit in andere jaore altied tiedens de Nach van ’t Limburgse Leed gebeurt ónderstreep de bizóndere samenwerking det d’r tösse de vereiniging en ‘t festival is. De pries geit idder jaor nao eine persoeën of groep met jaorelange verdeenste veur de Limburgse dialectmuziek in en boete de provincie. De winnaer krieg ein kunstwerk gemak door Mariëlle Franssen en ein oorkonde. 

 

  • Ton Engels 

Ton Engels (1952) oet Panningen haet al ein rieke, jaorelange muzikale loupbaan achter de rök as hae in 1994 euver geit nao dialectmuziek Tot dae tied zingk en schrief Ton in ‘t Ingels: met ziene groep Blowbeat toert hae jaore in ‘t binne- en boeteland. As hae ontdek det ‘t schrieve van leedjes in ‘t dialect um good aafgeit bouwt Ton ein twieëde carrière as dialek-arties op. In 1995 verschient ziene album Plat, gevolgd door nog vief cd’s in de taal van zien dörp. In 2000 is Ton de ierste winnaer van de Priès van 't Limburgs Leed, de aanmoedigingspries van de Nach van ’t Limburgse Leed dae later woort umgeduipt tot Jo Erens-Priès. Ton Engels schrief ein groeët dialect-oeuvre beejein en wuuert euveral geroemp vanwaege zien goje tekste en sterk gitaarspel. De, ouk als docent songwriting aan de Fontys Rockacademie in Tilburg, werkzame leedjesmaker is eine echte verhaoleverteller en haet de gave met zien beeldende tekste zien zeel bloeët te gaeve en andermans zeel te raken. Nao Arno Adams is hae de twieëde artiest dae de aanmoedigingspries van de Nach van ’t Limburgse Leed en de Veldeke Oeuvre-Pries wet te winne.

 

  • Reactie Ton Engels 

‘Ik vind waal det ik content met mien oeuvre bin. As ik zoeë de hiele rie aan leedjes bekiek dink ik: d’r zitte eine houp goje dinger beej. Ik heb mich altied veurgehalde um meziek te make dae ik, as ‘t op de radio veurbeej kump, ik zelf de meujte waerd zoel vinde en ouk zoel wille aanschaffe. Bij ‘t meiste van wat ik heb gemak is det tot op de daag van vandaag zoeë. Mien oeuvre greujt nog altied, maar as ik iets nies maak mót ‘t per definitie ouk iets toevoege. ‘t Mót neet ein herhaling zien van wat ik al heb, al wuuert die kans natuurlijk altied groeëter.’