U bent hier

Tegele 2014

Versjláag Tegelse declamatiewedsjtried Veldeke 2014

Op vriedig 18 april 2014 vóng de finale plaats van de Tegelse declamatiewedsjtried van Veldeke, in ’t Zaelke in Tegele. Op gôjje vriedig dus. En waoröm det gôjje vriedig hét, woort ôs daen aovend al flot dudelik!

Tegele bars van ’t talent in alle laeftiéde. Maar leefs 32 kinger hadde zich vasgebete in ’t versje van eur keuze en presenteerde det aan ’t publiek asof ze det al jaore doon. Vur vuël kinger is det ouch éch zoë want versjillende sjnuutjes ware ós al bekend. Weej hebbe wir genaote van ‘t begin wies ‘t eind. Theo Hamakers presenteerde d’n aovend nao ’t äöpeningswäördje van veurzitter Henk Buskes. Theo makde met idder kink ’n präötje en zörgde det de microfoon op gôjje hueegte sjting: van hiel liëg, toet hiel hoëg, en alles wat dao tössenin zit. De thema’s van de versjes varieerde van lekker knôddele met water toet sjtiekem rouke…. vur elk wat wils. Complimente dus aan de sjriévers Franc van Baar, Herman Bors, Susan Janssen, Annelies Holtman, Leonie van Hulten, Leo de Ronde en Truus Verbong die ouch dit jaor wir de kinger hebbe geprikkeld met ’n versje wat eur aansjprook.

Ouch volgend jaor zal de Tegelse werkgroep wir zien uuterste bés doon, öm ’t Tegels dialek laevetig te haje en kent ge wir op ’n niej aanbod van versjes raekene.

De jury besjting dit jaor óet 3 minse van de wiékraod Tegele, te weite de hiere Ger Hensen, Huub Smit en Barry Huskes. Ouch zeej gove aan det ’t niveau hoeëg loog en det jurere gen gemekkelik klusje is. Toch is eur det good gelök en woorte aan ’t eind van d’n aovend de volgende winnaers bekend gemak:

Baovebouw

1. Prescilla Reutelingsperger   Sjtiekem                                            Leo de Ronde

2. Dawn Geraads                   Sjtiekem                                             Leo de Ronde

3. Mila Thönissen                   Lekker laeze                                      Susan Janssen

Middebouw

1. Zoë Kuijpers                       Sjoeëlkrank                                          Herman Bors

2. Soleil Thönissen                 Waas ich maar altied baby gebleve Herman Bors

3. Bram Nellen                       Raegenlaarze                                    Leonie van Hulten

Ôngerbouw

1. Jasmijn Heiligers                Waterwerke                                       Leonie van Hulten

2. Cas Rijvers                        Hiel gezónk                                        Leonie van Hulten

3. Sadé Tuithof                      Waterwerke                                       Leonie van Hulten