U bent hier

Verslaag jaorvergadering 2015

Äöpening door de veurzitter d’n hier Henk Buskes:

Henk hit idderein van herte welkóm en is blie det de leje en dónneteurs met groeëte getale aanwezig zien. Hae verklap ves det ’t ein intersante róndleiding zal waere heej in 't archief. Taeves meld hae det zich haet aafgemeld: dhr. en mevr. Crommentuyn, mevr. Van Gerwen en mevr. Ebus.

Notule van de algemeine lejevergadering dd. 23 maart 2014:

De notule, waere, met dank aan de samesteller, goodgekeurd.

Bestuursverkezing. Aaftraejend zien Wilma Janssen en Frans van de Rijdt. Allebei stelle ze zich herkeesbaar. ’t Bestuur druueg Anneke van Kleef veur as nieje sikkertaris:

De herverkezing veur Frans en Wilma wuuerd, ónder applaus, goodgekeurd.

Ouk geldt dit veur Anneke van Kleef en krieg Anneke het speldje van Veldeke opgespeld.

Jaorverslaag:

Henk löp heej efkes euver haer. Dit steit ouk vermeld op ós thoesblaad.

Jaorciefers 2014 en de begruueting 2015 met oetleg door de penningfoekser:

Umdet ózze eige penningfoekser neet good beej stum is, guuef Wiel van Aarssen teks en oetleg. Zoë as geej zeet, zien 't gezónde ciefers. Vaerder zien d’r  gen vraoge en/of opmerkinge.

Verslaag kaskóntrolekemmissie en beneuming van de nieje kemmissie:

D’n hier Wil Janssen guuef teks en oetleg. Op 20 fibberwari 2015 hebbe ze beej Martin de financiën gekóntroleerd. Alles is op orde en de vereiniging wuuerd decharge verlieënd veur 't geveurde finansjele beleid.

D'n hier Lamers en D'n hier Janssen gaon nog 1 jaor door as kaskóntrolekemmissie.

Veuroetblik 2015 en ouk al 2016:

D'n agenda steit beej ós op 't thoesblaad. Henk guuef teks en oetleg beej de evenemente die Veldeke dit jaor geit organisaere. M.b.t. de zjurering van de faatse in d'n Blieriksen optoch zeuke weej nog eine kandidaat. 't Hoof genne Blierickse te zien.

In 2016 besteit Veldeke Limburg 90 jaor. Dit wuuerd dan ouk “Het jaor van het Dialekt”geneump. D'n hier Pieter Ebus, penningfoekser van Veldeke Limburg, neemp 't waord euver en guuef teks en oetleg euver 't ganse gebeure. E.e.a. kint geej op d’n tied laeze op de diverse sites.

In het algemein kump het ongevier heej op neer:

  • Samenwerking met de kringe. De kringe kriege ein beejdrage en meuge ouk waat organisere. Um 't fees finansjeel aaf te dekke is d'r ein aparte stichting opgerich veur dit fees.
  • Vanoet ózze krink haet Wiel van Aarssen plaats genaome in het besteur van die stichting.

  • De stichting is ein samewerking aangegaon met AmbaumBrandMakers die de aafgeloupe 2 jaor veur ós Veldekekids hebbe georganiseerd.

  • Ein book: Veldeke 90 jaor.

De startdatum veur 't jubileumjaor wuuerd 21-2-2016 in de Oranjerie in Remund. Vaerder zien nog in de planning: Naojaorconference, boeëttoch, róndtrekkende tentoeënstelling, Michelingids met Limburgse gerechte, spónsors waere gezóch, en bekinde Limburgers as ambassadeurs.

Róndvraog:

Mevr.Bleys vruueg of de cursus laeze en schrieve ouk veur minse van baove de riviere is. Schrieve zal waal lökke, maar praote zal iets anders gaon. De penningfoekser reageert adrem door te vermelde dat heej gen reiskoste vergoed waere.

Dhr. van Gestel: vruueg euver 't Venloos waordebook det al 2 jaor op d'n agenda stónd. Henk en Frans gaeve oetleg det de kóntrole haos klaor is en as alles good geit 't book begin december klaor is.  't book van noow is haos oetverkoch.

Dhr. W. Janssen guuef ein aanvölling um eventueel op inschrieving te doon. Henk neemp dit mei in de volgende besteursvergadering.

Dhr.Geenen vruueg: as d’r letters klaor zien, dees ouk drek op de site te zette. Nae dit is neet 't geval.

De veurzitter Henk Buskens: Veldeke Venlo haet nog winskaarte, gedichtebundesl etc. verkriegbaar.

Sloeting:

Veurzitter Henk bedank alle aanwezige met de opmerking det weej, heej alle, Veldeke ein werm hert toedrage.

Notuliste: Anneke van Kleef.