U bent hier

Venlo 2015

Declamatiewedstried in Venlo veur de kinder.

Op 16, 17 en 19 maart 2015 vanaaf 16.00 oor vinde de veurróndes plaats. De finale is op 10 april 2015 um 19.00 oor.
Veurróndes en finale vinde plaats in de Venlonazaal, Hoeëgewaeg 10-16 in Venlo.
Opgaeve tot 1 maart via de schoeël of via de e-mail : veldekedeclamatie@hotmail.com

Foto's van de declamatiewedstried 2015 in Venlo  :

Declamatie finale  van Veldeke Venlo 2015.

10 april waas ’t dan intelik zoeeë wiet, de finale van de declamatie 2015. Nao dreej spannende veurróndes die we op 16, 17 én 19 maart hebbe gehad, zien d’r  41 kinder door gegaon nao de finale.

We hadde dit jaor dutelik minder kinder als andere jaore, d’r ware eine houp kinder die neet dörfde en die op ’t letste moment aafzagte, heej beej wil ik óg ech mei gaeve… geej hoof ech neet bang te zien veur te declamere, ’t is hartstikke leuk um mei te doon!!! Probeer ’t volgend jaor ens en gaef dich gewoeën op en kiek dan ens op de veurrónde wie se ’t vinds? En meschien det dien moder of vader dich dao beej wilt helpe, want dit meug neet verlaore gaon…!

Dit jaor stond d’r eine catwalk in de zaal dae we mochte lieëne van de Venlonazaal, wao we hiel bliej mei ware, noow koste de kinder hielemaol de zaal in loupe, det waas erg jofel!

We hadde ein super jury dit jaor, die hadde allemaol waat met schrieve, vasteaovendleedjes schrieve en zinge: Wim Roeffen, Hay Geritz en Peter Jansen.

 De spanning waas um te snieje wie we um 19.30 oor begóste en wie Henk Buskes ’t veurwoord had gedaon, de microfoon aan Hans Jacobs goof, kwaam de zaal al good los.

Hans reep steeds 10 kinder nao baove die eur gedichje veur droge en oet det gruupke koos hae eine assistent dae de kinder deej intervieuwe, erg leuk…! Zoeë veel d’r hiel waat spanning van de kinder aaf.

Idder kind kreeg van Tiny en Gertie ein oeërkónde en ein kónsumptiebón.

Nao 21 kinder hadde we efkes pauze, kinder en elders koste lekker waat drinke en chips gaon haole. Sjraar Timmermans , dae andere jaore ouk mei deej met de declamatie, deej ziene buut veurdrage…  WAT HEBBE WE GELACHE!!!!  Volgend jaor kump se weer truuk hé Sjraar?

Hans haet nao de pauze de jury gevraog wie se ’t vónde…. ERG MOEILIK DUSSSS….! Wat zitte d’r kanjers beej zeg!

De twieëde helf van de aovend verleep ouk erg leuk, de spanning zoot d’r nog altied good in…

Wie alle 41 kinder gewaes ware, hebbe weer ein pauze gehad, um alles op ein riej te zette wae d’r beej de ierste dreej zoel e zitte.

Wie dan ’t moment dao waas det de prieze oetgereik woorte, mochte alle 41 kinder baove op de catwalk gaon zitte, ooooooh… WAAT WAAS ’T SPANNEND…..!!!

De jury neumde de winnaers op en krege ein VVV-bón en ein tóf beeldje!

De winnaers van de ónderbouw:

op 1. Jans Vaessen van ’t Groeneveld met: Bedtied

op 2. Imke Driessen van de Zuidstroom met: Bedtied

op 3. Emily Sassen van de St. Willibrordusschoeël met: Bedtied

Middebouw:

op 1. Maud Lücker  van de Koperwiek met: Plat praote

op 2. Kiki Severijns van Sint Martinusschoeël met: Aanlinge

op 3. Eefke Koninkxs van de Springbeek met: Aanlinge

Baovebouw:

Op 1. Quin Schatorié van de Sint Willibrordusschoeël met: Pretpark

op 2. Michelle Mulders van de Venlose Montessori Schoeël met: Kaal

op 3. Deveny van Cleef van de Venlose Montessori Schoeël met Kaal

De nummers 1 kriege ein oetnuuediging um mei te doon met de Limburgse finale op 16 mei in ’t Patronaat in Heerlen.

We haope det d’r volgend jaor weer hiel óntzettend vuuel kinder zien die mei wille doon.

Tot de volgende kier!

Annemie Schleepen-Schweitzer

Dialekvereiniging Veldeke Venlo