U bent hier

Finale 2009

Veldeke’s 6e Limburgse declamatiefinale

16 mei 2009.

Veur alle foto's klik op ónderstaonde link:

Foto's zien gemak door d'n hier Jos Verbong oet Tegele

Dit kier in Venlo. En wie!

College Den Hulster waas zoeë vrintelik ós van eur lokaliteit gebroek te laote make en det beteikende ‘ne rume zaal met ’n groeëte buun, vaerder gooj catering faciliteite en genóg parkeerruumpte. Wie de kinder met eur begeleiders binne kwame speulde ’t schoeëlorkes van Den Hulster en det goof direk ‘ne lekkere sfeer.

De Krink Venlo had ’t good veur ein geboeks.
Veldeke Limburg, de houf-organisator, trapde aaf. Piet Aben, co-ordinator van de wedstried, en de veurzitter van Veldeke Limburg Lei Pennings leidden ’t gebeure in.

Daonao ging de wedstried ech van start. Hans Jacobs, de veurzitter van Veldeke Krink Venlo, deej de presentatie same met de jeugdige Bob Knapen. En det goof ’n laevendig en dök geistig samespel. De kinder woorte dreej aan dreej nao de buun gebrach en weer truuk nao eur plaats, door een piepklein Akkermenke met ’n schattig aangekleid prinseske. De Kinjerkraom van L1 makde TV-opnames. Toch hadde de kleine acteurs maar weinig las van zenuwe. ’t Ging geweldig. ’t Publiek genoot. Allein de jury, waovan de leje oet alle deile van Limburg kwame, had ’t lastig want haos alle kinder haolde ’n hiel hoeëg nivo.

De pauze woort opgeluusterd door ‘ne rapgroep van basisschoeël de Zuidstroom oet Venlo met ‘ne prachtige leed euver respek en natuurlik ouk met ’n schoeën live optraeje van ’t al geneumpde schoeëlorkes. Kinder die det woele kóste zich door ’n presentatrice van de Kinjerkraom laote interviewe. Sterren in de dop!
Wie alle acteurs eur gedich hadde veurgedrage ging de jury in beraod um de winnaers vas te stelle. Det veel eur neet mei.

Piet Aben makde de winnaers bekind. Lé Giesen, veurzitter van Veldeke Kemissie veur Educatie, bedankde idderein dae deze middag tot ’n succes had gemak, in ’t biezónder de krink Venlo. Met ’n daverend applaus en ’n schoeën trofee ginge de gelökkige de buun aaf. Maar ouk wae neet in de prieze waas gevalle vertrok neet met laeg hand nao hoes. Iddere deilnemer kreeg ’n diploma en ’t book WEGWIJS mei.

Winnaers Limburgse finale

D’n oetslaag:

Categorie I, groep 3 en 4 van de basisschoeël

1. Max Bervoets Nieuwstadt
2. Floor de Loo Sint Joost
3. Juul Brueren Venlo

Categorie II, groep 5 en 6 van de basisschoeël

1. Anke Peters Susteren
2. Patty Kurvers Sint Joost
3. Gian Huijnen Koningsbosch

Categorie III, groep 7 en 8 van de basisschoeël

1. Jules Stoffels Sint Joost
2. Johannie Dieks Susteren
3. Nathalie Hover Echt