U bent hier

Finale 2008

Limburgse finale declamatiewedsjtrièd in Mesjtreech.

Vièf menute naodet de zaal aop ging in ’t Maartenscollege in Mesjtreech, kwaam ich binne met mien gezin. Mien collega Leonie waas al dao met ziene mins en had 4 sjteul vur ós vreej gehaje. Det waas ouch waal nuuedig want ’t waas bómvol en door alle veulbare sjpanning, waas ’t in de zaal dudelik wermer as boète….

Knap

Piet Aben äöpende de middig en wie alles gezag waas wat gezag mós waere, woort de bühne vreej gemak vur de optraejende kinger.
Knap huuer, ièrs al ’n versje van boète lière, op sjoeël veurdrage, as winnaer gekaoze waere en dén nao de Limburgse finale. Den haes se ’t al wièd gesjöp!
Ich vóng ‘t ’n hiele ièr öm tössen al det talent in de zaal te meuge zitte. En wie later ’t woort, wie rièker ich mich veulde. Wat ’n diversiteit aan dialekte!
Waat is ‘t Limburgs toch sjoeën en waat is ’t good öm dit door te bliève gaeve aan ós kinger.
’t Kosde de presentator, waal ens meujte öm door de kinger begrepe te waere, want Mesjtreechs sjprik neet idderein! Maar det brook juus de sjpanning en zörgde d’r veur det de kinger flot kóste laote zéen woeë ze veur gekómme ware: declamere!

Gruuets

En den zit se dao as… tja, as wat eigelik?
As moder vulde ich mei met de gruuetse elders in de zaal: ’t zal dien kink maar zien waat dao zien kunsje sjteit te dóon.
As sjrièver van gedichjes loesterde ich vural wat kinger gekaoze hadde, ter inspiratie vur volgende jaore.
En as lierkrach klopde mien hert get sjneller ömdet dit ‘ne middig vaol taal waas! Geej sjnap ’t al: ich had d’n dáag van mien laeve!
’t Lökde de kinger in de zaal én eur elders, tantes, oeëmes, opa’s en oma’s good öm ónger de veurdrachte sjtil te zien. Maar det kwaam netuurlik doordet de veurdragende kinger ’t publiek wiste te boeie én ömdet tössendoor lekker de vutjes van de vloer meugde met 2 sjtraotdansers, in baeter Nederlands “streetdancers”...
Op ‘t lets kwaam ’t verlossende waord van de jury: wae had de meisten indrök gemak? Ouch al ware de criteria vur de jury dudelik óetgelag: gank d’r maar aan sjtáon öm óet al det talent ’n keus te make. Maar de jury waas ’t ens gewaore en besjloot det dit de Limburgse kampioene ware:

!Óngerbouw:

  • 1e plaats: Raf Stoffels, Ech
  • 2e plaats: Gian Huijnen, Ech
  • 3e plaats: Mandy Rademakers, Venlo
  • Middebouw:

  • 1e plaats: Joannie Dieks, Sustere
  • 2e plaats: Famke Goossens, Tegele
  • 3e plaats: Lisa Bremmers. Velde
  • Baovebouw:

  • 1e plaats: Solange Wetzels, Kerkraoj
  • 2e plaats: Iris Lemmers, Wièrt
  • 3e plaats: Marnix Buquet, Sustere
  • Van deze middig zien filmopnames gemak door L1, die beej ’t programma “De Kingerkraom” euver 3 waeke waere oètgezonde. Vur idderein dae deze middig haet mótte misse is det dus ’n herkansing en ‘nen aanraojer!
    Kinger van Limburg: danke vur deze middig vol Limburgs amusement!

    Susan Janssen
    17 mei 2008

    Tegels