U bent hier

Nietsberichte

Niesbreef Jaorgank 2021 nummer 1

Leef leje en dónneteurs,

Heef de nietsbreef um óg op de huuegte te halde wao Veldeke Venlo mei bezig is. De corona elend blief maar doorgaon. Dao hebbe weej allemaol las van. ’t Is neet anders. As bestuur van Veldeke Venlo zitte weej met aangesnalde hand. Tóch zien weej bezig um aan de doelstellinge van Veldeke Venlo vorm te gaeve wie beperk ós meugelikheje heej in ouk zien.

As bestuur zien weej dan ouk toegetraoje tot ’t digitale tiedperk, det bliek neet allein oet deze digitale nietsbreef maar ouk door det weej as bestuur op gezatte tied digitaal vergadere. Op dees wies kinne weej toch de vinger aan de pols halde um as ’t weer meugelik is de activiteite van Veldeke Venlo geliek weer op te starte. Dao naeve hebbe weej de cursus Venloos laeze en schrieve digitaal opgestart. Bas Vissers haet, um dit “euver de buun te kinne trekke”, heej vuuel tied en energie in gestaoke. Waoveur de kómplemente. ’t Aantal aanmeldinge waas verrassend hoeëg, waat ós vuuel plezeer deej.

Planning activiteite veur 2021. Umdet ’t coronavirus ós allemaol nog waal ‘nen behuurlike tied in de greep zal halde en al van invloed waas op ós activiteite, zien weej dan ouk genoeëdzaak um nog ein aantal activiteite aaf te lasse en weej wille ouk gen inkel risico neme. Wannier weej dit weer kinne oppakke hingk aaf van ’t ónder kóntraole kriege van ’t coronavirus en wannier weer activiteite zien toegestaon.

Heej 't euverzich van de activiteite die zien aafgelas en die meschiens later in ’t jaor haopelik weer meugelik zien. 

           

Nietsbreef September 2020

Straotname binnestad Venlo in dialek, mit ’ne korte oetleg.

Op verzeuk van Venlo Partners is Wilma Janssen van ‘t bestuur op ’t ougenblik drök mit ’t vertale van de straotname van ’t historischcentrum van Venloin ‘t Venloos.’t Geit dan neet inkel um dae straotnaam maar ouk um ‘ne korten oetleg ( in ’n paar wäörd) van dae straotnaam.

Verzeuk van organisatie LVK aan Veldeke Limburg.

Beej Veldeke Limburg is ’n verzeuk van de organisatie van ’t LVK binnegekómme.Det verzeuk hilt de vraog in of weej as Veldeke de tekste van de ingezónde leedjes taege ’t leech van de Limburgse spelling 2003 wille halde.  Ein en ander op gehiel vreejwillige basis van de teksschriever(s) en dit is neteurlik ouk van de nuuedige geheimhaldingsprotocolle veurzeen.As Veldeke Venlo wille weej heej gaer aan mei werke.

Wisseling van Penningmeister Veldeke Venlo.

Martin Doesborg haet te kinne gegaeve det hae de functie van penningmeister wilt neerlegge.Nao ’ne korte zeuktoch haet ’t bestuurslid Wiel Maassenzich bereid gevónde um dees functie te gaon bekleie.Det zal dan zien per 01-10-2020 Martin blief veurluipig nog bestuurslid zoe”rdet hae op d’n achtergrónd ( zoeë nuuedig) raod aan de  nieje penningmeister kin gaeve.

 Oproop veur kandidate bestuur Veldeke Venlo.

Diana Vullings haet te kinne gegaeve det het aafscheid wilt neme as bestuurslid  van Veldeke Venlo.Dit en ’t op termien te verwachte aafscheid van Martin Doesborg as bestuurslidvan Veldeke Venlo beteikent nogal ’n oetdunning van ’t bestuur. Weej zien dan ouk op zeuk nao minse, binne en boete de vereiniging, die zich kandidaat wille stelle veur ’n functie as bestuurslid. Ós vraog aan óg is, weit geej meschiens emes in
óg umgaeving dae ( meug ouk bes ’ne jóngere persoeën zien) interesse haet  in Veldeke Venlo en dao bestuurslid zoel wille zien? As geej zoeë emes weit gaef det dan astebleef aan ós door, of laot dae persoen contac met ós opneme.

Wies de volgende Nietsbreef, en blief allemaol gezónd. Mit vrintelike kómplemente, Bestuur Veldeke Venlo.

 

Nietsbreef juni 2020

Beste leje en dónneteurs,

In ózze letste Kroedwis hebbe weej óg laote weite, det weej óg op de huuegte zoele halde euver de gevolge van ’t coronavirus veur ós activiteite. Gezeen de coronacrisis, kinne weej ós jaomer genóg neet persuuenlik treffe of spraeke en daorum vónde weej ’t ‘n good idee um deze nietsbreef te steure. Weej as bestuur kinne ós ouk neet treffe, maar weej hebbe waal inkele videovergaderinge gehalde.

Ouk veur ós is óndudelik wie ’t d’r de kómmenden tied oet geit zeen.Jaomer genóg hebbe weej al ‘n aantal activiteite mótte aaflasse. In augustus hadde weej nog ‘n Stadswandeling staon en in ‘t naojaor ‘ne Cursus Venloos laeze en schrieve en de Slumste Venlonaer. Activiteite die ouk neet door kinne gaon, gezeen de ónzekerheid euver ’t verloup van de coronacrisis en de regels die dan gelde.

Of de andere activiteite (fietstoch, vreejwilligersdaag en Kersactiviteit), die later dit jaor nog op de   planning staon, door kinne gaon, bekieke weej later. Dit hingk aaf van de dan geldende richliene. Ouk is ’t nog ónzeker of de Nach van ’t Limburgse Leed en de oetreiking van d’n Oeuvrepries door kinne gaon. Weej halde óg op de huuegte. Met deze nietsbreef wille weej óg ein hert ónder de reem staeke en winse weej óg vuuel sterkte. Weej haope óg flot weer te zeen .Met vrintelike groete en blief allemaol gezónd,

Dialekvereiniging Veldeke Venlo