U bent hier

Gedichte Tegele 2017

Acrobaat
 
Hup dao gaon ich, hopla hop
Ich sjtaon lekker op miene kop
Zeen alles sjeif en ouch krangsöm
Weit dôk ech neet mier woë ich bön
 
Soms dreit zich alles in mien maag
Toch maak ich kunste, idderen daag
Ich oefen flink en doon det gaer
Waal hônderd kier, sjtiëds maar wir
 
Mei en den val ich en heb ich pien
Maar acrobaat det wil ich zien
As ich maar genôg perbeer
Den weit ich zeker, det ich ’t waer
 
Leonie v. Hulten-v. Rhee
 
Bedtiéd
 
Saoves môt ich eigelik nao bed
Maar wae wet…
As ich miene pap leef aan zal kiéke
Zal dae waal bezjwiéke
 
En den ken ich nag lekker oppe bank gaon knóevele en chippies aete
Den haop ich det ze mich ein bietje zien vergaete
Ich haaj mich muuskessjtil
Want ich weit waal wat ich wil
 
Lekker in de pyjama, televisie kiéke en laat nao bed
Maar det velt mich nag neet met
Langksaam waere mien uigskes zjwaor
En den kump 't gevaor
 
Sjtiekem bön ich toch waal muug
Maar ich ving 't ech nag te vruug
Daags d'r op waer ich wakker in mien bed….
Nae hè, ich heb 't alwir neet gered!
 
Linda Hanraets-Weber
 
Nae... Nae…. Nae...... 
 
De gansen dáag huër ich 't zelfde
Nae... Nae…. Nae...... 
Beej alles wat ich vraog 
Is det 't antwaord van die of dae
 
Ich wil gewoën nao bóete toe
'n Bietje hange oppe sjtraot 
Maar as 't duuster wuërd en ich bön te laat
Den zien ze drek wir kwaod 
 
Miene gsm môt óet met aete
En meug ouch al neet mei nao bed
Soms dink ich den, ach man
Dôw kens mich retteketet
 
Maar ouch sjelde meug ich neet
Wat meug ich den nag waal?
En mien klein breurke, det meug alles
Terwiel ich gek waer van zien kebaal
 
Ich bön gewoën get vrech en waers
Puber zien, det is neet niks
Dôw môs de gansen tiéd oplette
Desse neet vanalles fliks
 
Det huërt gewoën beej dezen tiéd
Mien elders weite det neet mier
Det is vur die al iëuwe geleje
En vur mich is 't de iërste kier
 
't Kump ech waal good huër
Laot mich maar efkes 'ne waerse prengel zien
Want geej weit toch allemaol
Nao raegen en sjtorm kump altiéd zônnesjien
 
Hanneke van der Sommen