U bent hier

Oeuvrepries 2017

De œuvrepries 16 september 2017.

Janse Bagge Bend-frontman geieërd tiedes de Nach van ’t Limburgse Leed. Veldeke Oeuvre-Pries veur Henk Steijvers.

Henk Steijvers krieg dit jaor de Veldeke Oeuvre-Pries van ’t Limburgs Leed. Steijvers, bekind as zenger van de Janse Bagge Bend en van de groep Carboon, weurt geieërd veur zien groeëte verdeenste veur de Limburgse dialekmeziek. Veldeke-voorzitter Henk Buskes makde in ‘t L1-radioprogramma Plat-eweg bekind dat de keuze op de in Susteren woeënende Steijvers is gevalle. De oetreiking van de belangrieke pries vindt plaats in de Nach van ’t Limburgse Leed op zaoterdaag 16 september in Domani, in de Venlose binnenstad. Op det festival traejdt Henk Steijvers later op de'n aovend op met ziene Janse Bagge Bend.

Met Carboon had Henk Steijvers in de jaoren sevetig vuuel succes met de elpees Witste Nog, Koempel… en D’r Letste Koempel. Same met Jean Innemee, Ben Erkens, Conny Peters en teksschriever Jan Hendriks bouwde Carboon ein geweldig oeuvre aan mienleedjes op. Twieé jaor geleje vónd ein good óntvange én logische reünie van Carboon plaats: 2015 waas toch 't Jaor van de Mijnen.

In 1979 begós 'n andere formatie: de Janse Bagge Bend. Janse Bagge is bekind um zien eige tekste op bekinde, anderstalige nummers. In 1983 woort met Sollicitere zelfs 'n groeët landelik kassucces gemak. In det zelfde  jaor stónd de band op Pinkpop. In al die jaore haet Henk Steijvers dus laote zeen van alle merte thoes te zien.

Vurrig jaor nog woort Henk op ein gans andere meneer geieërd: hae woort Ridder in de Orde van Oranje Nassau.

En vergaet neet : Plat aan taofel. De winnaers van de declamatiewedstried ónderhalde de gaste aan taofel in 't restaurant. 

Kiek ouk op Nach van 't Limburgse Leed.